Skip to content
Freitag,29.03.2024Wir haben heute 8.00 - 12.30 für Sie geöffnet.04331 / 3 79 11

Deernicum? Bidde wat?

Wenn Se dat Woort spaansch vörkummt, liggt Se dor ganz richtig mit: Denn “Deernicum” – dat hebbt wi uns sülvst utdacht, un noch steiht dat Woort ok nich in den Duden binnen. Deernicum kummt vun Deern, dat is Platt un heet soveel as „weibliche Person“, ‐icum steiht för medizinische Inrichtungen. Tohoop heet dat ganz eenfach: Dat Deernicum is eerstmal dor för de Deerns in uns Gegend. Mit uns köönt Se snacken, as Se dat Muul wussen is. Denn wi verstaht Se – ok op Platt. Dat seggt wi to. Man ok dat is kloor: All de annern Deerns, de ut Noord un Süüd, ut Oost un West na uns hertrocken sünd, seht wi hier jüst so geern.

Mit wat köönt Se in’t Deernicum reken?

Dat Deernicum is eerstmal en normale Praxis för Gynäkologie. Bi uns gifft dat allens, wat to de Medizin för Froenslüüd mit tohöört: hier gifft dat de Vörsorg, wi hölpt mit, dat Se goot dör de Schwanger-Tiet kaamt. Un wi geevt Raat, wenn man keen Kind will oder wenn de Fro sik en Kind wünschen deit. Dat gifft Punkten, dor wüllt wi anners ween as vele vun de annern gynäkologischen Praxen. Denn för uns sünd Se weniger Patschentin un veel mehr Deern un Fro, de mit ehr egen Fragen, ehren Kummer un ehr Wünschen to uns kümmt. Un jüst so behannelt wi Se: Wi nehmt uns de Tiet, de Se bruukt un verkloort allens so, dat Se dat verstaht. Un wi warrt nie tofreden ween mit dat normale Ünnersöken, solang nich würklich allens kloor is. Denn dat geiht üm Se Ehr Gesundheit. Un dat wi dor verantwoortlich för sünd, dat nehmt wi bannig eernst. Dorüm sünd wi in Medizin-Fragen ok jümmers op den neesten Stand. Se köönt sik dor op verlaten: In’t Deernicum warrt Se na de Methoden vun hüüt ünnersöcht un behannelt.

Bi den schöönsten Ogenblick sünd wi an Se Ehr Siet.

En ganz wichtigen Punkt, woso wi in’t Deernicum uns Arbeit so geern möögt, is: Wi mithölpen, nee‘e Leven op de Welt to bringen. Eendoont, wo vele Froens wi al to Siet stahn hebbt, bet dat ehr Lütt op de Welt weer: För uns is dat jümmers noch en Wunner, dat uns anröhrt un glücklich maakt. Dorüm freit wi uns ganz dull, wenn de jungen Mudders seggt, se weern dormit tofreden, woans wi jüm dör de negen Maand holpen hebbt. Un wi freit uns, wenn se uns denn Biller vun jümehr Babys toschickt. Jeedeen Bild steiht för dat persöönliche Glück, dat wi geern mit Se deelt: In uns „Baby Hall of Fame“ wiest wi Se de nee’en Mitbörgers, de uns Deerns op de Welt bröcht hebbt. De Galerie bringt wi Maal üm Maal op den nee‘esten Stand – Kiek mal wedder in!

Definition Deernicum

Deern | icum, das (Neutrum)

Substantiv

Woneem dat Woort herkummt:

  1. Deern (plattdüütsch) = (junge) weibliche Person
  2. ‐icum (latiensch) = normale Endsilv för medizinische Inrichtungenn

Wat dat bedüden deit:

Dat Deernicum is en gynäkologische Praxis in Noorddüütschland, dat Team is bilingual (düütsch / plattdüütsch): Hier wüllt se de Deerns in de Gegend persöönlich un nipp un nau mit Raat un ok bi’t Behanneln to Siet stahn. Dat steiht ganz bavenan: Bi dat Deernicums sünd se fründlich un akkeraat, se weet Bescheed un se seggt kloor rut, wat los is.

Deernicum - die gynäkologische Praxis von Dr. Thorsten Maas - der Frauenarzt Ihres Vertrauens in der Region Büdelsdorf, Kiel, Hamburg, Rendsburg, Eckernförde - ist Mitglied im Berufsverband der Frauenärzte