Skip to content
Sonntag,14.07.2024Wir haben heute nicht geöffnet.Telefonisch erreichen Sie den ärztlichen Bereitschaftsdienst:116117

Moin – un vun Harten willkamen in’t Deernicum!

Se wüllt wat vun uns Praxis weten? Dat freit uns. Mag ween un Se weet noch nich so recht, wat dat Deernicum de passliche Froensdokter-Praxis för Se is. Dor gifft dat deernicum.de för: Hier köönt Se sik dor en Bild vun maken, wat bi uns op Se tokümmt.

För uns in’t Deernicum steiht ganz bavenan, dat de Deerns un Froens uns kennt un Totroen kriegt. Bi uns sünd Se nich en „Patschentin“ as vele anner ok – nee, bi uns sünd Se en Persöönlichkeit, de ehr ganz egen Kummer un Noot hett. Wi nehmt uns de Tiet, de nödig is. Un wi verkloort Se allens so, dat Se dat vun vörn bet achtern verstaht.

Dor höört ok mit to, dat Se uns Kru un Dr. Thorsten Maas kennen lehren köönt, ahn dat Se glieks ünnersöcht warrt. Dichter kümmt keeneen an Liev un Seel ran as Se Ehr Gynäkoloog. Un dat weet wi nipp un nau.

Schullen Se also en nee’en Froensdokter söken, köönt Se ok eenfach blots to’n Kieken un Snacken kamen. Seggt Se dat an, wenn Se sik en Termin haalt.

Un ok dat is kloor: Fraagt Se uns geern Löcker in’n Buuk! Dat gifft nix, över dat Se nich mit uns snacken köönt. Mit düütliche Wöör sünd Se bi uns an de richtige Steed. Bi uns geiht dat so to, as de Lüüd hier in’n Noorden sünd: jümmers op kloren Kurs.

 

Dat gellt ok för uns junge Deerns. In uns „Teenie-Spreekstünn“ finnt junge Deerns en Barg, wat jüm helpen deit, ehrdat se dat eerste Maal na’n Froensdokter gaht. Un: Dat is goot, wenn Deerns al vör de Pubertät na uns henkaamt – dat se sik gegen dat Humane Papillomavirus impfen laat. Dat HPV-Impfen sorgt vör gegen Gebärmudderhalskreevt. Dorüm seggt de Ständige Impfkommission bi‘t Robert-Koch-Institut in Berlin: Ok ganz junge Deerns schullen sik al impfen laten.

In’t Deernicum maakt wi nich blots dat HPV-Impfen, nee, een kann sik ok gegen all anner Krankheiten, de begäng sünd, impfen laten. Dat speelt en grote Rull, wenn dat Leven gesund aflopen schall. Ünner Impfungen steiht allens dat, wat een dorto weten mütt.

Wat genau speelt sik nu af in’t Deernicum? Uns Motto is: So kommodig as dat geiht – un so veel HighTech as nödig. För uns steiht bavenan, dat Se op best ünnersöökt warrt. Dorüm gifft dat bi uns de nee‘este Medizintechnik. So köönt Se to’n Bispeel dat sehn, wat de Dokter ok süht: An jeedeen Steed to’n Ünnersöken steiht en moderne Bildschirm.

In uns Huus hebbt wi meist kene Barrieren. Hier is allens as wi sülvst: klore Linien, hell, fründlich un mit wieden Horizont. Ok wenn wi en Klimaanlaag hebbt – koolt is dat bi uns nienich!

Woans Se na uns herkaamt, seht Se ünner Anfohrt. För Autos hebbt wi glieks vör’t Huus en Reeg Parkplätz, de nix kösten doot. Wi sünd in den „Büdelsdörper Lüchttorn“ mit binnen, in de eerste Etaasch över de Backstuuv Drews. Kloor finnt wi dat goot, wenn Se de poor Treed to Foot na de Praxis hoochloopt – man dat gifft ok en Ramp un en Fohrstohl.

 

Eendoont, wat Se en junge Deern sünd oder en Fro, de in de Mitt vun’t Leven steiht: Wi freit uns op Se! An’n besten, Se roopt an un maakt glieks en Termin af: 04331 / 3 79 11. Wenn Se Fragen hebbt oder wi wat to’n Nalesen toschicken schüllt: Drückt Se links op den Kuntakt-Knoop.

Deernicum - die gynäkologische Praxis von Dr. Thorsten Maas - der Frauenarzt Ihres Vertrauens in der Region Büdelsdorf, Kiel, Hamburg, Rendsburg, Eckernförde - ist Mitglied im Berufsverband der Frauenärzte