Wir haben vom 15. April bis 3. Mai geschlossen. Unsere Vertretungsärzte finden Sie unter "Praxiszeiten".
Dat dat Kind goot ankummt: Vörsorgen in de Schwangerschaft
Wenn en Fro en Kind kriegen schall, denn is dat wunnerbor – man dat kann een ok fix in Draff hollen. Dat sik de Froens liekers ganz sinnig un tofreden op den neen Gast freien köönt, dorför kiekt wi uns dat nipp un nau an: Wo gesund sünd Mudder un Kind? In’t Deernicum maakt wi dat normale Vörsorgen in de Tiet, wenn dat Kind in’t Liev wassen deit. Man bavento ünnersöökt wi all dree Maand noch mehr Saken, dat Se seker seggen köönt: Dat löppt allerbest. Wenn wi de Fro jümmers wedder to sehn kriegt, köönt wi ok fröh rutkennen, wenn dor wat scheef löppt. Un denn köönt wi dor ok fix gegenan gahn. Wi geevt Raat, wat en Fro in de Tiet mit en Kind in’t Liev maken schull – un wat nich. Ok vertellt wi, woans Se krall un kregel dör de 40 Weken dörkaamt.
„Deernicum – geern ok bi dat veerte Kind.“
Bente Fethke ut Tetenhusen hett al dat een oder anner beleevt – mit dat Schwanger-Ween un mit dat Dernicum. Dreemal is se schwanger ween, tweemal weer se Patschentin in’t Deernicum. Wat se vun’t Deernicum hollt?
Dr. Maas is mit Liev un Seel Dokter. He kickt sik allens vun Grund op an. He kennt sik allerbest ut un nimmt sik Tiet, wenn he wat verkloort. Ja, he sorgt för mi. Dat kannst marken, wat sien Job em bedüden deit. Ach ja: schick un püük hebbt se de Praxis maakt – dat is echt de Knaller. In düsse Stuven is dat heel un deel kommodig.
Vörsorgen in de Tiet mit wat Lütts in’n Buuk – un wat een dorvun weten schull
40 Weken oder 9 Klennermaand lang wasst dat Kind in den Buuk vun de Fro. Düsse Tiet deelt sik op in dree mal dree Maand. In de „Richtlinien för dat Mudder-Ween“ (utarbeidt vun den Bunnsutschuss vun de Dokters un Krankenkassen) is allens fastleggt, wat bi dat normale Vörsorgen ünnersöcht warrt. Bavenan staht Ultraschall, Bloottest – un natüürlich ok, dat de Dokter un de Fro, de Mudder warrt, mit’nanner snackt. Op düsse Oort sorgt Se un wi vör – toeerst eenmal den Maand, in de letzten beiden Maand, ehrdat dat Kind kümmt, sogoor alle twee Weken. Wat dorbi faststellt warrt, schrievt wi in den Mudderpass rin. Dat hölpt mit, wenn sik Dokters, Heevammen un de Klinik uttuuschen mööt.
Eerst‐Trimester‐Screening
De Naam seggt dat al: dat Eerst-Trimester-Screening gifft dat in’t eerste Drüddel vun de Schwanger-Tiet: Den Bloottest un dat Ünnersöken mit Ultraschall maakt man twüschen de 12. un 14. Week. Dor warrt denn op keken, wat bi de Chromosomen wat verkehrt lopen is, as bi dat Down-Syndrom oder bi Trisomie 13 un 18. Is man sik nich seker, kann achteran noch mehr ünnersöcht warrn, so kann de Amniozentese oder de Chorionzottenbiopsie maakt warrn.
Rutfinnen, wat sik verkehrt utbillt – dat Nipp-un-Nau-Henkiek-Programm
Düssen Weg gaht wi, wenn dat Anteken dorför gifft, dat dat Kind, dat noch nich op de Welt is, krank is, oder dat dor wat anners wassen deit as dat schull. Un kloor: ok, wenn Se as Patschentin so akkeraat ünnersöcht warrn wüllt. To dat Nipp-un-Nau-Henkiek-Programm höört ok, dat mit Ultraschall ankeken warrt, woans dat Kind in den Mudderbuuk an all Steden utsüht. To’n Bispeel mit de Echokardiographie – dor ünnersöökt wi dat Hart vun dat Kind mit Ultraschall. Af un an sett wi ok de 3D/4D-Sonographie in. Ok köönt wi mit Doppler un Farvdoppler bekieken, woans dat Bloot dör dat Lütt dörlöppt. Dor köönt wi vun aflesen, wo goot dat Kind toweeg is. Mag ok ween un wi mööt invasiv ünnersöken – denn mööt wi wat vun binnen bekieken. To’n Bispeel, wenn wi vun dat Fruchtwater wat afnehmt un ünnersöökt. Oder bi en Biopsie – denn överwiest wi de Patschentin aver na en Zentrum, dat dorför tostännig is. In jeden Fall överleggt wi, wat de een oder anner Weg bringt un wat dat an Gefohren för dat Lütt bedüden deit. Kloor, dat wi blots mi Se tosamen fastleggt, op wat en Oort un Wies wi Se ünnersöökt.
Doppler‐Sonographie
Bi de Doppler-Sonographie (se hett ehren Naam vun den Mann, de düt Verfohren entwickelt hett) meet wi mit Ultraschall, wo goot dat Bloot dör de Gebärmudder löppt, un ok, wo goot dat Bloot twüschen dat Lütt un den Mudderkoken (Plazenta) un in dat een oder anner Organ löppt. So kriegt wi to weten, wat dat Kind goot versorgt warrt un wat wi villicht in de Schwanger-Tiet dormit reken mööt, dat wat scheef löppt – wenn dat to’n Bispeel en Präklampsie gifft.
Serologische Tests op Infekschoonskrankheiten
Dat gifft Infekschoonskrankheiten, de doot de Fro nich veel, mag ween un se fallt nich mal op, man för dat Lütt köönt se böös gefährlich ween. Teemlich licht köönt wi an dat Bloot sehn, wat de Fro gegen de Infekschoonskrankheiten, de an’n meisten vörkaamt oder de de gefährlichsten sünd, immun is oder nich. Dor höört Röteln mit to, Lues, Chlamydien, Varizellen (Windpocken) un Hepatitis B. Bavento kann dat goot ween, wenn wi nakiekt, woans dat mit anner Krankheiten utsüht, as
Toxoplasmose, Cytomegalie (CMVInfekschoon) oder Ringelröteln.
Schilddrüsen‐Test
Forschers hebbt rutkregen: Wenn de Schilddrüüs vun de Mudder ok blots en lütt beten weniger leisten deit as se dat schull, warrt de Gefohr grötter, dat dat Kind dor en Schaden vun afkriggt oder to fröh oder doot op de Welt kümmt. Goot is: Düsse Gefohr köönt wi licht afwennen. Mit en eenfachen Test meet wi, mööglichst an den Anfang vun de Schwanger-Tiet, den TSH-Weert (dat is dat Schilddrüsenhormon). Stellt wi fast: de Schilddrüüs arbeidt nich noog, kann man goot Thyroxin togeven. Dat is ganz licht to. De Test schull op jeden Fall maakt warrn, wenn de Fro fröher mal wat mit de Schilddrüüs harr oder wenn sik Anteken dorför in de Familie finnt.
Test op Schwangeren‐Diabetes
De Zuckerkrankheit in de Schwanger-Tiet (Gestationsdiabetes mellitus) is een vun de Krankheiten, de bi Froenslüüd, de wat Lütts kriegen schüllt, an’n meisten vörkaamt. Wat dor achter stickt: In düsse Tiet bruukt de Fro mehr Insulin. Un wenn nich noog dor is, denn stiggt de Blootzuckerspegel an un denn kümmt dor denn en Diabetes op. Dor markt een aver gor nix vun. Dorüm seggt wi: Twüschen de 24. un 28. Week schull jeedeen Fro, de Mudder warrt, en Test op Zuckerlast maken. Patschenten, för de dat Schwanger-Ween mit mit mehr Gefohren verbunnen is as bi annern, schullen den Test al vörher maken. Finnt wi denn rut: Ja, dat is Diabetes, köönt de meisten Froenslüüd dor sülvst wat gegen doon. Wenn man sien Eten un Drinken ümstellt un sik en beten mehr bewegen deit, so mit Swömmen un to Foot gahn, kann man dat meistens henkriegen, dat de Blootzuckerspegel wiet noog na ünnen geiht. Blots wenn dat nich langt, köönt wi bavento Insulin geven. Un keen Bang: Wenn dat Lütt eerst op de Welt is, denn geiht bi de meisten de Schwangeren-Diabetes wedder weg.
Wi geevt Raat: Dat Leven leven – Eten un Drinken
Wi sünd in de Schwanger-Tiet vun Anfang bet Enn för Se dor – wi ünnersöökt Se nipp un nau, man wi geevt ok Raat in all de Fragen, de anstaht. Denn wenn wat nich goot löppt, kann een dat in’n Griff kriegen, wenn man sik dor op instellt. Dat Se nich smöken schullen un ok keen Alkohol drinken, dat versteiht sik vun alleen. Man wokeen kann al seggen, wat vun allens dat, wat wi eet un drinkt, goot is, un wat een lever weglaten schull. Wat för Medizin dröfft Se nu noch nehmen? Woveel Sport is gesund? Un wat för Sport? Op all düsse Fragen geevt wi geern en Antwoort, de op Se afstimmt is. Dat doot wi geern. Un wi kennt uns ut.
Zusatzuntersuchungen in der Schwangerschaft (IGeL)
Ultraschalluntersuchungen in der Schwangerschaft sollten sich auf das medizinisch Notwendige beschränken. Allerdings können diese im Einzelfall die Sicherheit für Mutter und Kind erhöhen. Teilweise sind diese Leistungen bei entsprechenden Risikokonstellationen im Leistungsinhalt der gesetzlichen Krankenkassen enthalten. Andere Leistungen müssen privat gezahlt werden. Sie sind sogenannte individuelle Gesundheitsleistungen (IGeL).
Woveel schwanger bün ik överhaupt?
Düsse Fraag höört sik an as en Jux, man liekers is se eernsthaftig meent: Vele Froens, de Mudder warrt, fraagt sik dat würklich. Dor achter stickt, se wüllt weten: „Wat för en Dag is dat ween, dat ik schwanger worrn bün?“ un „Wo lang genau bliev ik schwanger?“ Dat is ok keen Wunner, denn de Oorten, düsse negen Maand op’n Punkt uttoreken, köönt een wohrhaftig bregenklöterig maken. Dorüm geevt wi geern Bescheed:
So lang wasst en Kind in’t Mudderliev
An’n Anfang befrucht en Samen en Eizell. Vun dor an duert dat 38 Weken, dat sünd 9,5 Lunarmaand*, also 267 Daag.
Vun den eersten Dag vun de letzte Regel duert dat 40 Weken – dat sünd 10 Lunarmaand, also 280 bet 282 Daag.
Fachlüüd, de bi de Geburt hölpt, fangt also an to reken bi den eersten Dag vun de letzt Regel, un se rekent ok in kumplette Schwangerschaftsweken (SSW). Dorgegen rekent vele anner Lüüd de Maand anners, also 9 Klennermaand oder 10 Lunarmaand vun veer Weken.
*Wir rechnen mit der durchschnittlichen Zykluslänge von einem Mondmonat, 28 Tagen.
Deernicum - die gynäkologische Praxis von Dr. Thorsten Maas - der Frauenarzt Ihres Vertrauens in der Region Büdelsdorf, Kiel, Hamburg, Rendsburg, Eckernförde - ist Mitglied im Berufsverband der Frauenärzte