Nootfall – wat to doon is

Wenn de Praxis apen is, sünd wi jümmers för Se dor.

Wenn Se wegen en Krankheit oder mit wat Lütts in’t Liev in Noot sünd, köönt Se uns geern ansnacken oder anropen: 04331 / 3 79 11

Liekers hebbt wi hier dat opschreven, wat Se weten mööt, wenn Se vun de Gesundheit her in en Nootlaag sünd.

Nootfall – wat schall ik maken?

Wenn Se faststellt: Mit de Gesundheit süht dat bi Se oder en anner Minsch so ut, dat een bang warrn mütt, haalt Se bidde stantepe en Dokter. Töövt Se nich! Dat gellt vör allen, wenn de Kopp nich kloor is, dat Lufthalen swoorfallt, dat Hart Kummer maakt oder dat Bloot nich goot dörlöppt.

De Reddungsleitsteed kriegt Se faat, wenn Se 112 wählt.

Dor sett se allens in Gang, wat nödig is, un se schickt ok den Nootdokter un womööglich ok anner Reddungsmiddel na Se hen.

Noottelefon – wat mutt ik seggen?

In de Reddungsleitsteed arbeidt Lüüd, de sik allerbest utkennt. Geevt Se op all Fragen Antwoort un leggt Se nich eenfach vun sik ut op.

Wenn bi Se oder de Fro, för de Se anroopt, wat Lütts ünnerwegens is, vertellt Se dat bidde de Lüüd in de Leitsteed.

Un wenn’t geiht, geevt Se Bericht to düsse Punkten:

1: Wat is passeert?

2: Woneem is dat passeert?

3: Üm wo vele Minschen geiht dat?

4: Wat genau hebbt de Lüüd afkregen, wat fehlt jüm?

5: Wannehr is dat ween?

6: Töövt Se op Fragen un seggt Se, wokeen Se sünd.

Mag ween un de Lüüd vun de Reddungsleitsteed wüllt noch anners wat weten. To’n Bispeel köönt se ok anseggen, wat Se maken köönt, bet dat de Nootdokter dor is.

Wat maak ik, wenn ik bi’t Noottelefon anropen heff?

Doot Se bidde allens dat, wat de Reddungsleitsteed seggt hett, un maakt Se Eerste Hölp, so goot as Se dat köönt. Wenn Hölp kümmt, roop Se oder winkt Se. Höört Se op dat, wat de Reddungslüüd seggt un blievt Se dicht bi, dat Se Utkunft geven köönt över dat, wat passeert is.

Wenn Se en Dokter bruukt un de Praxis is dicht

Wenn dat Leven op’t Speel steiht, roopt Se bidde den ärztlichen Bereitschaftsdeenst.

De Bereitschaftsdeenst sorgt dorför, dat en Dokter ok in de Tiet, wenn de Praxen dicht sünd, na Minschen henkümmt, de nödig medizinisch versorgt warrn mööt. Ok in de Nacht, an’t Wekenenn un an Fierdaag doot Dokters Deenst un sorgt för kranke Minschen.

För den Bereitschaftsdeenst gellt överall in Düütschland de Nummer 116117. Dor anropen köst nix.

De Bereitschaftsdeenst is wat anners as de Reddungsdeenst.

Wi seht to, dat allens, wat hier steiht, op den nee’esten Stand is. Man wi köönt dor keen Garantie för övernehmen, dat an düsse Henwiesen nix ännert oder anpasst warrt, dat sik villicht en Telefonnummer oder en Afloop ännert.