Ga naar hoofdinhoud
Samstag,02.03.2024Wir haben heute nicht geöffnet.Telefonisch erreichen Sie den ärztlichen Bereitschaftsdienst:116117

Impfen: de Pieks, de hölpen deit

In’t Deernicum weet wi: Wenn een gesund ween schall, denn höört dor de ganze Minsch mit to. Goot vörsorgen, dat heet för uns ok: Wi köönt mehr doon as dat, wat bi’n Froensdokter normal as Vörsorg ünnersöcht warrt. Ok dat Impfen sorgt vör: De lütte Pieks gifft Sekerheit för’t Leven. Denn Se schützt nich blots sik sülvst. Nee, dat bringt ok wat för de Lüüd, mit de Se tohoop sünd. Dat man sik nich ansteken deit mit Krankheiten, de womööglich veniensch sünd oder sogor den Dood bringt.

Prof. Dr. Gerd Neumann:

„Bi uns in Düütschland laat sik veel to wenig Lüüd impfen, un dat an all Kanten vun de Gesellschaft“

(kiek na bi: Prof. Dr. Gerd Neumann: Impfungen in der Frauenarztpraxis. In: Gyn Praktische Gynäkologie 19 (2014), S. 260–268).

Ok de STIKO, dat is de Impfkommischoon bi dat Robert-Koch-Institut in Berlin, de den Opdrag för ehr Doon vun den Bund hett, stellt siet Johr un Dag fast: Wat in Düütschland impft warrt, langt vör un achtern nicht.

Dat is uns Vörslag: Wenn Se dat nächste Maal in’t Deernicum sünd, bringt Se doch bidde Se Ehren Impfpass mit. So kriegt wi to weten, woans dat mit de Impfsekerheit bi Se utsüht. Wenn op de Impflist wichtige Punkten fehlt oder wenn en Impf-Typ opfrischt warrn mütt, köönt wi dat geern bi uns in’t Deernicum maken.

Eendoont, wat Se nu een vun uns junge Deerns sünd, wat Se geern Kinner hebben wüllt oder över 60 sünd: Bi’t Impfen köönt Se sik fast op uns verlaten. Kloor löppt allens na den nee‘esten Stand vun de Wetenschaft. Un wi kennt uns ut, wenn dat dorüm geiht: Wat bringt dat Impfen un wat för Gefohren gifft dat?

Dat gifft natüürlich noch anner Oorten vun Impfen. De wi hier opföhrt hebbt un de wi in uns Praxis maakt, dat sünd de, de ut de Sicht vun Froensdokters de wichtigsten sünd.

Gebäärmudderhalskreevt (HPV – Humane Papillomaviren

Humane Papillomaviren (HPV) köönt Gebäärmudderhalskreevt in Gang setten. Vele Minschen mit Sexualleven steekt sik jichenswenn mit HPV an – un leider markt se dat nich mal. Denn anners as bi Gripp gifft dat keen Anteken för de Krankheit. Hett man sik mit HPV ansteken, kann över de Johren dor Gebäärmudderhalskreevt vun warrn. Dorüm liggt uns düsse Impf-Typ so an’t Hart. Denn he schützt vör HPV un vör den Kreevt, de sogor den Dood bringen kann.

Op jeden Fall schullen sik Deerns gegen PH-Viren impfen laten, ehrdat se den eersten sexuellen Kuntakt hebbt. Blots so is seker, dat de Virus noch nich bi jüm lannt is. De STIKO seggt: Beter is dat, wenn Deerns al mit 9 impft warrt. Uns Raatslag: Laat Se ehr Dochter un ok sik sülvst op jeden Fall gegen HPV impfen. Denn düsse lütte Pieks kann wiss un wohrhaftig dorför sorgen, dat sik keen Kreevt breet maken deit.

Ok wenn Se sexuell aktiv sünd un nich impft sünd, kann dat liekers wat bringen, wenn Se sik impfen laat. Wi snackt geern mit Se tosamen doröver, wat dat bringt, un wat dor gefährlich an is.

Ok dat noch: Dat HPV-Impfen is de allerbeste Gelegenheit för ganz junge Deerns, dat se den Froensdokter kennenlehrt un dor nich bi ünnersöcht warrt. So köönt de Deerns en lütt beten Fiduuz kriegen – un dat hölpt bi den eersten „richtigen“ Besöök bi den Froensdokter.

Een Woort noch an de jungen Deerns: Wenn ji noch nie bi en Gynäkoloog ween sünd un nich weet, wat op jo tokümmt: Kiekt doch mal langs bi de Teenie-Spreekstünn hier op deernicum.de! Hier kriegt ji en Barg to weten, un dat lohnt sik. Achteran sünd ji wiss (meist) nich mehr bang vör dat eerste Maal bi den Froensdokter.

Masseln, Mumps, Röteln (MMR)

Wi kennt Masseln, Mumps un Röteln, kott „MMR“, as klassische Kinnerkrankheiten. Mehr un mehr steekt sik aver ok junge oder utwussen Lüüd an. Wat leeg is: Je öller de Minsch is, de sik ansteken deit un krank warrt, je gefährlicher kann dat för Liev un Leven warrn.
Bi Röteln kümmt bavento: Is en Kind ünnerwegens un de Fro steekt sik an – dat is för dat Lütt böös gefährlich. Keen Wunner, dat Deerns al lang gegen Röteln impft warrt. Seggt warrt: Dat is goot för all, de na 1970 op de Welt kamen sünd un / oder de nich all de nödigen Impfungen hebbt. Maakt warrt dat as Dreefach-Impfung MMR, dor is eenfacher mit ümtogahn.

Gripp (Influenza)

Anners as bi en grippalen Infekt, wenn man sik also en beten verköhlt hett, is de echte Gripp böös gefährlich, dat kann sogor üm Leven un Dood gahn – vör allen bi öllere Minschen, Lüüd, de en Tumor hebbt, un Froens, bi de wat Lütts ünnerwegens is. För düsse Minschen, man ok för all de annern, is dat beter, se laat sik eenmal in’t Johr impfen, ehrdat de grote Grippwell losgeiht. Un: Dat Impfen is ok goot för Froens na de 12. Week in de Schwanger-Tiet. Dat Impfen bringt kloor mehr Vör- as Nadele.

Windpocken (VZV-Infektion)

Mit Windpocken kann een sik licht ansteken – keen Wunner, dat de mehrsten utwussen Lüüd in Düütschland dat al mal hatt hebbt. Vele sünd dor ok gegen impft. Liekers gifft dat jümmers noch Minschen, an de nie de Utlösers vun Windpocken, dat sünd de VZV-Viren, rankamen sünd. So’n Lüüd köönt sik teemlich gau ansteken, wenn Windpocken in se ehr Ümfeld vörkümmt. För Froens, de en Kind kriegen schüllt, is de Gefohr groot: Steekt se sik an, kann dat Kind dootblieven oder en Schaden mitkriegen. Wenn Se en Kind wüllt, schullen Se dorüm nakieken laten, wat de VZV-Viren bi Se keen Schaden anrichten köönt. Un wenn dat nödig is, schullen Se sik impfen laten. Dat is goot för Se sülvst, dat Kind un de Minschen üm Se to.

Kinnerlähmung (Poliomyelitis, Polio)

Ok wenn man in Düütschland dor nich groot mit reken mütt, dat een Kinnerlähmung kriggt: Seht Se to, dat Se sik gegen Polio impfen laat. Denn dat asige Virus is noch lang nich ut de Welt. Ok is dat opstunns veel in Oosteuropa ünnerwegens, un so kunnen de Viren na uns wannern. Dat de Poliomyelitis-Virus bi uns nix utrichten kann, dorför is dat nödig, sik dorgegen impfen to laten – so lang, bet de WHO dat schafft hett, dat dat düssen Virus op de ganze Welt nich mehr gifft.

Polio-Impfen höört to dat Standard-Programm för all Minschen to. Laat Se op jeden Fall nakieken, wo goot Se schützt sünd – vör allen, wenn Se in de Medizin arbeidt oder wenn Se in Gegenden reist, woneem man sik licht ansteken kann. Bringt Se doch eenfach bi Se Ehren nächsten Termin den Impfpass mit. So köönt wi rutkriegen, wat Se al goot afsekert sünd.

Kinkhoost (Pertussis)

Hett man sik mit Pertussis ansteken, sett sik dor wat op den Sliemfilm, woneem man Luft haalt. Dor kann Kinkhoost vun warrn, un de kann böös gefährlich ween. Kriegen doot dat vör allen Kinner un junge Lüüd, aver ok de ganz Lütten köönt sik dat weghalen. Man de köönt wi noch nich impfen. Dat Liev kann dor nix mit anfangen, dat kann nix gegen Pertussis opboen. Wat wi maakt: Wi impft de Mudder un all Lüüd, de an dat Kind rankaamt. Wat dorbi rutkümmt, dor seggt de Mediziners „Herdenimmunität“ to. So is dat meist nich mööglich, dat sik dat Lütt ansteken deit.

Wenn bi Se al wat Lütts ünnerwegens is, impft wi, wenn dat Kind en poor Daag op de Welt is – in de negen Maand vörher schall man sik nich gegen Kinkhoost impfen laten.

Snackt Se mit Se Ehren Partner un all, de mit dat Kind tohoopkaamt, wenn dat frisch op de Welt is. Wi geevt geern Raat an Se un Se Ehr Lüüd.

Tetanus un Diphtherie

Wenn wi Se gegen Pertussis impft, denn ok glieks gegen Tetanus un Diphtherie – normaal maakt wi dat as Kombi-Impfen.

De düütsche Impfkommischoon STIKO seggt, dat is goot, wenn man sik vun Grund afsekert gegen düsse gefährlichen Krankheiten. Dat Dreefach-Impfen schull all teihn Johr opfrischt warrn. Jüst so seht wi dat ok.

Tetanus – de Lüüd seggt dor ok „Wundstarrkrampf“ to – kann man sik al vun en ganz lütten Ritsch weghalen. Dat Bakterium „Clostridium tetani“ un de Sporen dorvun, de meist nich doot to kriegen sünd, gifft dat överall, ok in den Stoff op de Straat un in de Eer in’n Goorn. To’n Glück laat sik in Düütschland en Barg Lüüd dorgegen impfen, dorüm breedt sik de Krankheit hier nich so ut. Man ok dat is wohr: Jede Veerte, de Tetanus kriggt un över 45 is, starvt doran. Böös gefährlich is dat Tetanus-Bakterium för schwangere Froens un för dat Kind, dat se in’t Liev hebbt. Meistens mööt beide starven. Dorüm is dat heel un deel wichtig, dat sik de Fro impfen oder dat Impfen opfrischen lett, noch ehrdat dat Kind ünnerwegens is!

Dat sülvige gellt för Diphtherie. Düsse Krankheit sleit op de böveren Luftwegen. Dat Impfen hett ok hier dorför sorgt, dat blots wenige Minschen sik ansteekt. Man in anner Länner is de Süük noch överall, un se kann gau na uns herkamen. Blots een vun dree is bi uns mit Impfen afsekert. Dorüm uns Raatslag: Laat Se sik impfen.

Wat Se gegen Diphtherie un Tetanus impft worrn sünd un wannehr, dat steiht in Se Ehren Impfutwies binnen. Bringt Se em eenfach mit, wenn Se dat nächste Maal in’t Deernicum sünd.

Hepatitis B

De gode Naricht vörweg: In Düütschland steekt sik wenig Lüüd mit Hepatitis B an. Dat heet: De Schangs is hier nich groot, dat een sik Hepatitis B weghaalt. An’n meisten kriegt dat Minschen twüschen 30 un 39. Wenn Se en Kind hebben wüllt, snackt wi mit Se doröver, wat dat Hepatits-Impfen nödig is oder nich. Denn wenn Se sik eerst mit Hepatitis B ansteken hebbt, warrt sik to 80 bet 90 Perzent ok dat Kind ansteken – wenn Se dat Kind nich foorts impft, wenn dat op de Welt is oder wenn de Fro noch in de 9 Maand Medikamenten kriggt. Meist jümmers heet dat: Ok dat Kind warrt an Hepatitis B chronisch krank.

De Mudderschaftsrichtlinien geevt den Kurs dorför vör, dat wi de Froens mit wat Lüüts in’n Buuk op Hepatits-Antigene ünnersöökt. Kloor, wi kiekt ok geern na, woans dat mit de Impfsekerheit bi Se utsüht.

All, de vun jümehr Profeschoon mit Medizin to doon hebbt, schullen sik op jeden Fall impfen laten. Se kaamt mit vele Patschenten tohoop un köönt sik an de een oder anner Wunn oder an en Sliemfilm ganz licht mal ansteken.

Se wüllt geern en Kind kriegen?

Op düsse List köönt Se afhaken, op wat een bi’t Impfen achten mütt.

Uns Raatslag: Wenn Se en Kind kriegen wüllt, schullen Se op jeden Fall nakieken, gegen wat Se impft sünd. Un wenn dor wat fehlen deit, schullen Se dat gau maken laten.

Bringt Se eenfach den Impfpass mit in de Spreekstünn. Wi kiekt uns denn mit Se tohoop an, wat noch ansteiht – un Se köönt sik ok glieks in’t Deernicum impfen laten.

  • All dat normale Impfen maken.
  • De Mudder un all Lüüd, de in de Neegde vun dat Lütt sünd, gegen Kinkhoost (Pertussis) impfen
  • Nakieken, wat een seker is vör Röteln.
  • Nakieken, wat een seker is vör Windpocken, langt de Antikörper dorgegen?
  • Wo goot is de Schutz gegen Hepatitis B?
  • Je na Johrstiet: Laat Se sik gegen Gripp impfen.
  • De STIKO-Richtlinien geevt den Impf-Kurs vör: nakieken, impfen oder opfrischen.

Deernicum - die gynäkologische Praxis von Dr. Thorsten Maas - der Frauenarzt Ihres Vertrauens in der Region Büdelsdorf, Kiel, Hamburg, Rendsburg, Eckernförde - ist Mitglied im Berufsverband der Frauenärzte